“ஒரு மனிதர் மறைந்தாலும், அவர் நட்ட மரங்கள் வாழ்ந்தால் அவர் இன்னும் உயிரோடு இருக்கிறார்.” இந்த உண்மையை தனது வாழ்க்கையால் நிரூபித்தவர் தான் விழுப்புரம் மாவட்டம், சங்கீதமங்கலம் கிராமத்தைச் சேர்ந்த ‘மரம்’ கருணாநிதி.
Thank you for reading this post, don't forget to subscribe!ஆகஸ்ட் 1 அன்று, இயற்கையை உயிராக நேசித்த அந்த மனிதர் நம்மை விட்டுப் பிரிந்தார். ஆனால் அவர் உருவாக்கிய பசுமைச் சுவடுகள் அழியாது. அவர் நட்ட மரங்கள், விதைத்த சிந்தனைகள், ஊக்கப்படுத்திய மனிதர்கள் என அனைத்தும் அவரை என்றும் நினைவுகூரச் செய்யும்.
கருணாநிதி ஒரு சுற்றுச்சூழல் ஆர்வலர் மட்டுமல்ல. அவர் ஒரு இயக்கம். ஒரு விழிப்புணர்வு. ஒரு வாழ்க்கைப் பாடம். மரங்களைப் பற்றி பேசுவதில் மட்டும் நிற்காமல், அவற்றை நட்டு, வளர்த்து, பாதுகாத்து காட்டிய செயல்வீரர்.
ஓட்டுநர் பணியில் இருந்தபோதே தொடங்கிய பசுமைப் பயணம்
தமிழ்நாடு அரசு போக்குவரத்து கழகத்தில் ஓட்டுநராகப் பணியாற்றிய காலத்திலேயே அவரது பசுமைப் பயணம் தொடங்கியது. தினமும் பல கிராமங்கள், சாலைகள், வயல்கள் வழியாகப் பயணித்தபோது இயற்கையின் அழகை நெருக்கமாக ரசித்தார். அதே நேரத்தில் மரங்கள் குறைந்து வருவதையும் வேதனையுடன் கவனித்தார்.
அந்த வேதனை அவரை செயல்படத் தூண்டியது. “யாராவது செய்வார்கள்” என்று காத்திருக்கவில்லை. “நானே தொடங்க வேண்டும்” என்று முடிவு செய்தார். அதுவே அவரது வாழ்க்கையை மாற்றிய திருப்புமுனையாக அமைந்தது.
ஊதியத்தின் பாதி… மரங்களுக்காக!
பலர் தங்கள் வருமானத்தை குடும்பத்திற்காகச் செலவிடுகிறார்கள். கருணாநிதி அதற்கு ஒரு புதிய அர்த்தம் கொடுத்தார். தனது ஊதியத்தின் பெரும்பகுதியை மரக்கன்றுகள் வாங்குவதற்காக ஒதுக்கினார். அவற்றை நட்டு, தண்ணீர் ஊற்றி, பாதுகாத்து, பெரிய மரங்களாக வளர்த்தார்.
அதுமட்டுமல்ல, யார் மரக்கன்று கேட்டாலும் இலவசமாக வழங்கினார். மரம் வளர வேண்டும் என்பதுதான் அவரது நோக்கம். அது யாருடைய நிலத்தில் வளர்கிறது என்பது அவருக்கு முக்கியமில்லை.
இந்த அர்ப்பணிப்பே அவரை மக்களிடையே ‘மரம்’ கருணாநிதி என்று அன்போடு அழைக்க வைத்தது.
ஐந்து லட்சம் மரங்கள்… ஒரு மனிதனின் சாதனை
ஒரு மரம் நடுவது எளிது. ஆனால் அதை உயிருடன் வளர்ப்பது சவாலான வேலை. கருணாநிதி அந்தச் சவாலை வாழ்நாள் முழுவதும் ஏற்றுக்கொண்டார்.
அவர் நட்டு வளர்த்த மரங்களின் எண்ணிக்கை ஐந்து லட்சத்தைத் தாண்டியிருக்கும். அவரின் நோக்கம் எண்ணிக்கை அல்ல. ஆகையால், அதற்கான புள்ளிவிரம் அவரிடம் இல்லை. ஆனால், அவர் வளர்த்த மரங்கள் சாட்சியாக உள்ளன. ஆயிரக்கணக்கான நாட்களின் உழைப்பு. எண்ணற்ற பயணங்கள். கணக்கிட முடியாத தியாகங்கள். இயற்கை மீது அளவற்ற அன்பு…. என்று ஒவ்வொரு மரத்தையும் தனது குழந்தையாகவே பார்த்தார். அந்த மரங்கள் வளர்வதைப் பார்ப்பதில்தான் அவர் உண்மையான மகிழ்ச்சியைக் கண்டார்.
கோ. நம்மாழ்வாரின் சிந்தனையை வாழ்வாக்கிய சீடர்
இயற்கை வேளாண் விஞ்ஞானி கோ. நம்மாழ்வாரின் சிந்தனைகள் கருணாநிதியின் வாழ்க்கையில் ஆழமான தாக்கத்தை ஏற்படுத்தின. மரம் வளர்ப்பது சுற்றுச்சூழலை மட்டுமல்ல; சமூகத்தையும், பொருளாதாரத்தையும் காக்கும் முதலீடு என்பதை அவர் புரிந்துகொண்டார்.
அதனால் தான் அவர் எங்கு சென்றாலும் மரம் வளர்ப்பைப் பற்றியே பேசினார். பழங்களைச் சாப்பிட்ட பிறகு விதைகளை வீசாமல் மண்ணில் புதைக்க வேண்டும் என்று மக்களிடம் தொடர்ந்து வலியுறுத்தினார்.
மேலும், பெண் குழந்தைகள் பிறக்கும் குடும்பங்கள் சந்தன மரம் நட வேண்டும் என்ற கருத்தையும் முன்வைத்தார். அந்த மரம் வளரும்போது குழந்தையின் கல்வி அல்லது எதிர்காலத் தேவைகளுக்கு உதவும் என்ற அவரது சிந்தனை, சுற்றுச்சூழலையும் சமூக நலனையும் இணைத்த ஒரு தொலைநோக்குப் பார்வையாகும்.
ஒரு வரலாற்று நிகழ்வின் பின்னணியில் இருந்த மனிதர்
2013 ஜனவரி 27-ஆம் தேதி, காஞ்சிபுரம் மாவட்டம் கைத்தண்டலம் கிராமத்தில் ‘பசுமை விகடன்’ மற்றும் ‘எழில்சோலை அறக்கட்டளை’ இணைந்து மாபெரும் மரம் வளர்ப்பு கருத்தரங்கை நடத்தின.
இன்று தமிழ்நாட்டில் பல அமைப்புகள் நடத்தும் மரம் வளர்ப்பு இயக்கங்களுக்கு முன்னோடியாக அமைந்த நிகழ்வுகளில் இதுவும் ஒன்று. அந்த நிகழ்ச்சி வெற்றிபெற திரைக்குப் பின்னால் பிரதி பலன் பாராமல் உழைத்தவர்களில் முக்கியமானவர் மரம் கருணாநிதி.
அந்த நிகழ்வில்தான் ‘எழில்சோலை’ மாசிலாமணியுடன் அவருக்கு ஆழமான நட்பு உருவானது. பின்னர் பல ஆண்டுகள் அந்த நட்பு தொடர்ந்தது. கடந்த சில ஆண்டுகளாக உடல்நலக் குறைவால் அவதிப்பட்ட கருணாநிதிக்கு தேவையான மருத்துவ உதவிகள் கிடைக்கவும், அவரை அக்கறையுடன் பராமரிக்கவும் மாசிலாமணி முக்கிய பங்கு வகித்தார்.
நான் பார்த்த கருணாநிதி
எனது பத்திரிகைப் பயணத்திலும் மரம் கருணாநிதிக்கு தனி இடம் உண்டு.
பல கிராமங்களுக்கு என்னை நேரில் அழைத்துச் சென்றவர் அவர்தான். விவசாயிகளைச் சந்திக்கவும், அவர்களின் வெற்றிக் கதைகளை பதிவு செய்யவும் ஊக்கப்படுத்தினார். நல்ல செய்திகளை மக்கள் அறிய வேண்டும் என்பதில் அவர் மிகுந்த அக்கறை கொண்டிருந்தார்.
நான் எழுதிய கட்டுரைகளைத் தவறாமல் வாசிப்பார். பிடித்திருந்தால் மனதாரப் பாராட்டுவார். கருத்து வேறுபாடு இருந்தால் தயக்கமின்றி விமர்சிப்பார். அதனால் அவர் ஒரு வாசகர் மட்டுமல்ல; சிந்திக்க வைக்கும் ஆசிரியரும் ஆவார்.
தினமும் செய்தித்தாள்களையும் வேளாண்மை இதழ்களையும் வாசிப்பது அவரது வழக்கம். புதிய தகவல்களை அறிந்துகொள்வதில் அவர் எப்போதும் ஆர்வமாக இருந்தார்.
அங்கீகாரத்தைவிட இலட்சியத்தைத் தேர்ந்தெடுத்தவர்
கருணாநிதி மனதில் பட்டதை நேராகச் சொல்வார். அந்த வெளிப்படையான குணம் சில நேரங்களில் அவருக்குக் கிடைக்க வேண்டிய அங்கீகாரங்களைத் தள்ளிப் போட்டிருக்கலாம்.
இருப்பினும், அதைப் பற்றி அவர் ஒருபோதும் கவலைப்படவில்லை. விருதுகளை விட மரங்களே பெரிய சாதனை என்று நம்பினார். அதனால் தான் ஓய்வுபெற்ற பிறகும் முழு நேரத்தையும் மரம் வளர்ப்புக்கே அர்ப்பணித்தார்.
அவருக்கு வாழ்க்கை என்றால் மரம். மரம் என்றால் வாழ்க்கை.
‘மரம்’ கருணாநிதி குறித்து,மதுரையைச் சேர்ந்த சேவா தொண்டு நிறுவனத்தின் விவேகானந்தன் நினைவு கூறும் போது, ”25 ஆண்டுகளுக்கு முன்பே சங்கீதமங்கலம் பகுதியில் மரம் வளர்ப்பு, கால்நடை மூலிகை மருத்துவம், இயற்கை விவசாயம்… பற்றிய விழிப்புணர்வு பிரச்சாரத்தை தொடங்கினார் ‘மரம்’ கருணாநிதி. நானும் கூட அவர் ஏற்பாடு செய்த நிகழ்ச்சிகளில் கலந்து கொண்டுள்ளேன். இயற்கை வேளாண் விஞ்ஞானி கோ.நம்மாழ்வாரையும் கூட அவர் பகுதிக்கு அழைத்து வந்து பேச வைத்துள்ளார். எங்கள் அடிமட்ட கண்டுபிடிப்பாளர் சங்கத்துடன் இணைந்து செயல்பட்டார்” என்று தெரிவித்தார்.
அவருக்கு நாம் செலுத்த வேண்டிய உண்மையான அஞ்சலி
இன்று மரம் கருணாநிதி நம்மிடையே இல்லை. ஆனால் அவர் நட்ட ஒவ்வொரு மரமும் அவரது வாழ்க்கையைப் பேசுகிறது. அவற்றின் நிழலில் ஓய்வெடுக்கும் மனிதர்களும், கிளைகளில் கூடுகட்டும் பறவைகளும், அந்த மரங்கள் தரும் தூய காற்றை சுவாசிக்கும் குழந்தைகளும் அவரது சேவையின் உயிருள்ள சாட்சிகள்.
எனவே, அவரை நினைவுகூரும் நாளில் கண்ணீர் சிந்துவது மட்டும் போதாது. அவர் காட்டிய பாதையில் ஒரு அடியாவது எடுத்து வைக்க வேண்டும். ஒரு மரக்கன்றை நட்டு, அதை உயிருடன் வளர்க்க வேண்டும். அதுவே அவருக்கு நாம் செலுத்தும் மிகப் பெரிய மரியாதை.
‘மரம்’ கருணாநிதி இன்று இயற்கையோடு கலந்திருக்கலாம். ஆனால் அவர் விதைத்த பசுமை இந்த மண்ணில் என்றும் வாழும். மரங்களின் இலைகள் அசையும் ஒவ்வொரு தருணத்திலும், இயற்கை அவருடைய பெயரை அமைதியாக உச்சரித்துக்கொண்டே இருக்கும்.
“ஊதியத்தை மரங்களுக்காக செலவிட்ட மனிதர்… ‘மரம்’ கருணாநிதி இயற்கையோடு கலந்தார்!”க்கு ஒரு பதில்”
-
மரம் கருணாநிதி, அய்யா எங்கு கூட்டம் நடத்தினாலும் அங்கு சில மரக்கன்றுகளோடு வந்துவிடுவார். பலமுறை நான் வியந்துள்ளேன். அய்யா அவரை அரவணைப்பார். தனது ஊதியத்தில் செலவிட்டவர். அவரது புகழ் ஓங்குக.
3
20
20
Professor | Journalist | Writer | Orator | Reader | Researcher
Founder & Editor – Tamil Nature , Professor of Practice – தமிழ்நாடு வேளாண்மைப் பல்கலைக்கழகம், பசுமை விகடன் இதழின் மேனாள் இதழாசிரியர்.
கூடுதல் தகவல்கள்: https://tamilnature.com/author/
மறுமொழி இடவும்