தமிழ்நாட்டின் புதிய முதலமைச்சராக உள்ள ஜோசப் விஜய்க்கு மகாத்மா காந்தியின் பேரன் கோபால்கிருஷ்ண காந்தி எழுதிய திறந்த மடல் — மு.க. ஸ்டாலின், சுற்றுச்சூழல் பாதுகாப்பு, மதச்சார்பின்மை குறித்த முக்கிய வேண்டுகோள்கள்.
Thank you for reading this post, don't forget to subscribe!மதிப்பிற்குரிய முதலமைச்சராகத் தேர்ந்தெடுக்கப்பட்டுள்ள சி. ஜோசப் விஜய் அவர்களுக்கு,
வாழ்த்துகளும், உங்களது மகத்தான வெற்றிக்கு எனது மனமார்ந்த பாராட்டுகளும்.
உங்களுக்கு வாக்களித்த சுமார் 35 சதவீத மக்களில் நான் ஒருவன் அல்ல. ஆனால் தேர்தல் முடிவுகள் வெளிவந்தபோது நான் உண்மையிலேயே திகைத்துப் போனேன். அதே சமயம் எனக்குள் ஒரு எண்ணம் தோன்றியது: இவர் புதியவர், அதாவது அனுபவம் இல்லாதவர்; அதன் அர்த்தம் இவர் புதிய சிந்தனை கொண்டவர், தூய்மையானவர்.
அவரிடம் சில உண்மைகளைச் சொல்ல வேண்டும், அவர் அதைப் புரிந்துகொள்வார் என்று எனக்குத் தோன்றியது. நடுத்தர வயதை எட்டிப்பார்த்துக்கொண்டிருக்கும் இளமையின் ஞானம் அவரிடம் உள்ளது. எனவே, முதலமைச்சர் அவர்களே, இந்தச் சில கருத்துகளை உங்கள் முன் வைக்கிறேன்:
வாக்குகளை வென்றுவிட்டீர்கள்; ஆனால் சட்டமன்றத்தில் முக்கியமான பெரும்பான்மைச் சோதனையை (Floor Test) நீங்கள் இன்னும் வெல்ல வேண்டியுள்ளது. இந்தியாவின் கூட்டாட்சி மற்றும் மதச்சார்பற்ற கட்டமைப்பைப் பாதுகாப்பதே உங்களது முதல் முன்னுரிமையாக இருக்க வேண்டும். அரசியலமைப்பின் அடிப்படைத் தன்மையை நிலைநிறுத்தும் மாநிலமாக உங்களது மாநிலம் திகழட்டும். உங்கள் பதவியைக் காப்பாற்றிக்கொள்ளும் பதற்றத்தில் இதில் ஒருபோதும் சமரசம் செய்துகொள்ளாதீர்கள்.
வெற்றிக் களிப்பு என்பது நல்ல தார்மீக ஆடை அல்ல; மாறாகப் பொறுமை கலந்த நிதானமே சிறந்த அடையாளம். நீங்கள் யாருக்குப் பின் பதவிக்கு வருகிறீர்களோ, அந்த மு.க. ஸ்டாலின் அவர்கள், பெரியார் விட்டுச் சென்ற சுயமரியாதை எனும் பாரம்பரியத்தையும், சமூகத்தில் சமத்துவத்தைக் கொண்டுவர எடுக்கப்பட்ட விடாமுயற்சிகளையும் பிரதிபலிப்பவர். அவரது அனுபவம் உங்களுக்கு ஒரு பாடமாக இருக்கட்டும். திராவிடம் எது, எதுவல்ல என்பது குறித்த தர்க்க ரீதியான விவாதங்களில் சிக்கிக்கொள்ளாதீர்கள். அவர் உங்கள் முன்னோடி, உங்கள் வேட்டையாடி அல்ல. நீங்கள் அவரது வாரிசு, அவரைத் தூக்கி எறிய வந்தவர் அல்ல. உதயநிதி ஸ்டாலினின் சட்டமன்ற வருகையை உங்களுக்கு ஒரு சவாலாகப் பார்க்காமல், ஒரு சிறந்த ஜோடியாகக் கருதுங்கள் — நடால் மற்றும் ஃபெடரர் இடையிலான ஆட்டத்தைப் போல, திறமைகளின் சமநிலையாக அது இருக்கட்டும்.
உங்கள் கொள்கை என்ன என்று கேட்கப்படலாம். அது உங்களை நிலைகுலையச் செய்யாமல் பார்த்துக்கொள்ளுங்கள். “எனது மனசாட்சியைப் பின்பற்றுவதே எனது கொள்கை” என்று அவர்களுக்குச் சொல்லுங்கள்.
அரசு அதிகாரிகளை உங்களுக்குக் கீழ் பணிபுரிபவர்களாக அல்லாமல், சக ஊழியர்களாக நடத்துங்கள். முகஸ்துதி செய்வதே சேவை என்று அவர்கள் தவறாக நினைத்திருக்கலாம். சர்தார் பட்டேல் உள்துறை அமைச்சராக இருந்தபோது அதிகாரிகளிடம் சொன்னது போல, அச்சமின்றி நேர்மையான கருத்துகளையும் ஆலோசனைகளையும் வழங்கச் சொல்லுங்கள். அதோடு, பதவியிலிருந்து விலகும் அமைச்சர்கள் மீதான விமர்சனங்களை ஊக்கப்படுத்தாதீர்கள்.
கடைசியாக முதலமைச்சர் அவர்களே, நல்லாட்சி மற்றும் பொருளாதார முன்னேற்றத்தைத் தக்கவைப்பதோடு, சுற்றுச்சூழல் பாதுகாப்பிற்கு முதன்மை முன்னுரிமை அளிக்க வேண்டும். எல்லாவற்றுக்கும் மேலாக, வெறுப்பில்லாத, பயமில்லாத, நீதியான இந்தியாவிற்கு ஒரு வழிகாட்டியாகத் திகழுங்கள். தனிப்பட்ட முறையில் ஒன்றைச் சொல்ல விரும்புகிறேன்: இந்த மாநிலத்தின் அரசாங்கத்தை ஒரு கிறித்தவர் வழிநடத்துவது இதுவே முதல் முறை. தமிழ்நாட்டின் மதச்சார்பற்ற தன்மைக்குக் கிடைத்த வரமாக இதைக் கருதுங்கள். அந்தப் பாரம்பரியத்தைக் குறைத்து மதிப்பிட யாரையும் அனுமதிக்காதீர்கள். வள்ளுவரும் நீங்கள் அப்படிச் செய்வதை விரும்ப மாட்டார்.
உங்களுக்கு வெற்றியைத் தாண்டி, ஒரு மனநிறைவான ஆட்சிக்காலம் அமைய வாழ்த்துகிறேன்.
— கோபால்கிருஷ்ண காந்தி
(The Hindu, மே 6 — ஆங்கிலத்தில் வெளிவந்த மடல்; கட்டுரையாளர், மகாத்மா காந்தியின் பேரன் , முன்னாள் மேற்கு வங்க ஆளுநர்)
2
20
20
20
Leave a Reply