இந்தியாவின் முக்கியமான தோட்டப் பயிர்களில் தேங்காய்க்கு தனி இடம் உண்டு. லட்சக்கணக்கான விவசாயிகளின் வாழ்வாதாரத்துக்கு தென்னை மரங்கள் துணையாக உள்ளன. மேலும், தேங்காயை அடிப்படையாகக் கொண்ட பல்வேறு பதப்படுத்தும் தொழில்களுக்கும் இது மூலப்பொருளாக உள்ளது.
Thank you for reading this post, don't forget to subscribe!தேங்காய் உற்பத்தியில் இந்தியா உலக அளவில் முன்னணி நாடாகத் திகழ்கிறது. உலகளாவிய தேங்காய் உற்பத்தியில் இந்தியாவின் பங்கு மட்டும் 30.37 சதவீதம் என தெரிவிக்கப்பட்டுள்ளது.
139.70 லட்சம் டன் தேங்காய் உற்பத்தி!
வேளாண்மை மற்றும் விவசாயிகள் நல அமைச்சகத்தின் 2024-2025 இறுதி மதிப்பீடுகளின்படி, இந்தியாவில் சுமார் 21.90 லட்சம் ஹெக்டேர் பரப்பில் தேங்காய் சாகுபடி செய்யப்பட்டுள்ளது.
👇தொடர்ந்து படியுங்கள்…சுருக்கு
இதன் மூலம் சுமார் 139.70 லட்சம் டன் தேங்காய் உற்பத்தி செய்யப்பட்டுள்ளது. இதில் தமிழ்நாடு, கர்நாடகா, கேரளம் மற்றும் ஆந்திரப் பிரதேசம் ஆகிய நான்கு மாநிலங்கள் முக்கிய பங்கு வகிக்கின்றன.
தமிழ்நாட்டில் மட்டும் சுமார் 43.04 லட்சம் டன் தேங்காய் உற்பத்தி செய்யப்பட்டுள்ளது. கர்நாடகாவில் 37.76 லட்சம் டன்னும், கேரளாவில் 35.43 லட்சம் டன்னும், ஆந்திரப் பிரதேசத்தில் 11.94 லட்சம் டன்னும் உற்பத்தி செய்யப்பட்டுள்ளது.
மிக முக்கியம், இந்த நான்கு தென்னிந்திய மாநிலங்களும் இணைந்து நாட்டின் தேங்காய் உற்பத்தியில் சுமார் 92 சதவீதம் பங்களிக்கின்றன.
தமிழகத்தில் தேங்காய்க்கு முக்கிய இடம்!
தமிழ்நாட்டில் தென்னை சாகுபடி என்பது ஒரு விவசாயப் பயிர் மட்டுமல்ல. இது கிராமப்புற மக்களுக்கு வேலைவாய்ப்பையும் வழங்குகிறது. அதேபோல், தேங்காய் சார்ந்த பதப்படுத்துதல் மற்றும் மதிப்புக்கூட்டல் தொழில்களுக்கும் அடிப்படையாக உள்ளது.
2024-2025ஆம் ஆண்டில் தமிழகத்தில் சுமார் 5.06 லட்சம் ஹெக்டேர் பரப்பில் தென்னை சாகுபடி செய்யப்பட்டுள்ளது. இதன் மூலம் சுமார் 43.04 லட்சம் டன் தேங்காய் உற்பத்தி செய்யப்பட்டுள்ளது.
மேலும், கோயம்புத்தூர், திருப்பூர், தஞ்சாவூர், திண்டுக்கல், தேனி, கன்னியாகுமரி மற்றும் ஈரோடு ஆகிய மாவட்டங்கள் தமிழகத்தின் முக்கிய தேங்காய் உற்பத்திப் பகுதிகளாக உள்ளன.
இதனால், தேங்காய் மற்றும் கொப்பரை விலையில் ஏற்படும் மாற்றங்கள் தமிழக விவசாயிகளுக்கு நேரடியாக முக்கியத்துவம் பெறுகின்றன.
கொப்பரை விலை எப்படி இருக்கும்?
இந்த நிலையில், கொப்பரை விலை குறித்து தமிழ்நாடு வேளாண்மைப் பல்கலைக்கழகம் முக்கியமான சந்தை ஆய்வை மேற்கொண்டுள்ளது.
தமிழ்நாடு வேளாண்மைப் பல்கலைக்கழகத்தின் உள்நாட்டு மற்றும் ஏற்றுமதிச் சந்தை நுண்ணறிவுப் பிரிவு, ஆனைமலைச் சந்தைகளில் நிலவிய கொப்பரையின் கடந்த 25 ஆண்டுகால விலைத் தரவுகளை ஆய்வு செய்துள்ளது.
இதனுடன் வர்த்தகத் தரவுகளையும் கருத்தில் கொண்டு சந்தை நிலவரம் பகுப்பாய்வு செய்யப்பட்டுள்ளது.
இந்த ஆய்வின் அடிப்படையில், அக்டோபர் 2026-ல் நல்ல தரமான கொப்பரையின் விலை கிலோவுக்கு சுமார் ரூ.145 முதல் ரூ.150 வரை இருக்கும் என எதிர்பார்க்கப்படுகிறது.
இந்த விலை கணிப்பு கொப்பரை விவசாயிகளுக்கு முக்கியமான தகவலாக பார்க்கப்படுகிறது.
பண்டிகைக் காலம் கைகொடுக்குமா?
வரும் மாதங்களில் பண்டிகைக் காலங்கள் தொடங்க உள்ளன. பொதுவாக பண்டிகைக் காலங்களில் பல்வேறு உணவுப் பொருட்களுக்கான தேவை அதிகரிக்கும்.
அதேபோல், தேங்காய் மற்றும் கொப்பரைக்கும் கூடுதல் தேவை ஏற்பட வாய்ப்பு உள்ளது என வர்த்தக வட்டாரங்கள் தெரிவிக்கின்றன.
மேலும், தேவை அதிகரிக்கும் சூழலில் சந்தை விலையிலும் மாற்றம் ஏற்படலாம். எனவே, விவசாயிகள் அவசரமாக விற்பனை செய்வதற்கு முன்பு சந்தை நிலவரத்தை கவனிப்பது அவசியம்.
இருப்பினும், சந்தை விலை என்பது பல்வேறு காரணிகளைப் பொறுத்து மாறக்கூடியது. உற்பத்தி, வரத்து, தேவை, தரம் மற்றும் சந்தைச் சூழல் போன்றவை விலையில் தாக்கத்தை ஏற்படுத்தலாம்.
விவசாயிகள் என்ன செய்ய வேண்டும்?
கொப்பரை விலை குறித்து கிடைத்துள்ள இந்த கணிப்பு விவசாயிகளுக்கு ஒரு வழிகாட்டியாக இருக்கலாம். ஆனால், இது உறுதியான விலை உத்தரவாதம் அல்ல என்பதை கவனத்தில் கொள்ள வேண்டும்.
மிக முக்கியமாக, கொப்பரையின் தரத்துக்கு ஏற்ப விலை மாறுபடலாம். எனவே, தரமான கொப்பரையை தயாரித்து சரியான சந்தையில் விற்பனை செய்வது விவசாயிகளுக்கு பயனுள்ளதாக இருக்கும்.
மேலும், ஒரே நேரத்தில் முழு விளைபொருளையும் விற்பனை செய்வதற்குப் பதிலாக, சந்தை நிலவரத்தைக் கண்காணித்து விற்பனை முடிவுகளை எடுப்பது குறித்து விவசாயிகள் தங்கள் உள்ளூர் சந்தை மற்றும் வணிக நிலவரத்தையும் கருத்தில் கொள்ளலாம்.
எனவே, அக்டோபர் 2026 கொப்பரை சந்தையை விவசாயிகள் கவனமாக கண்காணிக்க வேண்டிய காலமாக இருக்கிறது. தமிழ்நாடு வேளாண்மைப் பல்கலைக்கழகத்தின் இந்த சந்தை ஆய்வு, விவசாயிகள் விற்பனை முடிவுகளை எடுக்க உதவும் ஒரு முக்கியமான சந்தைத் தகவலாக அமைகிறது.
மேலும் விவரங்களுக்கு
உள்நாட்டு மற்றும் ஏற்றுமதிச் சந்தை நுண்ணறிவுப் பிரிவு
வேளாண்மை மற்றும் ஊரக மேம்பாட்டு ஆய்வு மையம்
தமிழ்நாடு வேளாண்மைப் பல்கலைக்கழகம்
கோயம்புத்தூர் – 641 003.
தொலைபேசி: 0422-2431405
3
20
20
Professor | Journalist | Writer | Orator | Reader | Researcher
Founder & Editor – Tamil Nature , Professor of Practice – தமிழ்நாடு வேளாண்மைப் பல்கலைக்கழகம், பசுமை விகடன் இதழின் மேனாள் இதழாசிரியர்.
கூடுதல் தகவல்கள்: https://tamilnature.com/author/
Leave a Reply